انه شاعر خزعلي
اكتب ابذاكره تاريخ الشعوب العلني
انه شاعر خزعلي
المع بنص الظلام .. وأماي كاسي من الحقائق والاوهام
من أريد اختم بداية ومن ابدي ختام
انه طبعي النخل واطباع الحمام ..
ابهيده ويه الروح ترفه وماتحب غير السلام
انه مايوكف مداري وزمني
انه شاعر خزعلي
انه نيشاني الكمر واهس امبحر على شراع الخطر
انه حزني الطين واجروحي المطر
انه كلبي جرف ضامي وغيرتي وعمري نهر
انه اعمامتي وبيريتي وعكالي فخر ..
صوتي ضميري .. وسري عزة نفسي .. ومعاناتي صبري ..
حضني أمي .. وصيتي أبوي .. وعين صاحبتي غنوتي وشجني
انه شاعر خزعلي
انه هلهوله ونواعي وانه ضيجي بكد وساعي
الدنيه من اتضيج افرش ضيمهه
وتخفه على سباحه اذراعي
دفتر الكل قصه تطريهه المدينة
وطور ناي ..
اخضر مثل عشب المراعي
عيني جانون اليدلي اضيوفه بيه
وقلمي حد للمايعرف احدود كاعي
انه ماعون الكرم وانه الرغيف
اليكبر اشما كصه وياه جف السنين
انه دمعه مالحه وعركه جبين
انه عين .. وسيف وبد لذل منحني
انه شاعر خزعلي